Германија денеска почна случајни проверки на своите граници со пет западноевропски земји во обид да се спротивстави на илегалната миграција, проширувајќи го веќе воспоставениот контролен систем на четири други граници.
Полициските контроли почнаа утрово на границите со Франција, Холандија, Белгија, Луксембург и Данска и треба да траат шест месеци.
Германија од минатата година врши проверки на границите со Полска, Чешка, Австрија и Швајцарија.
Германија минатата недела објави дека од денеска ги проширува граничните контроли на сите девет копнени граници како дел од напорите за сузбивање на илегалната миграција и криминалот по неодамнешните екстремистички напади.
Минатиот месец три лица загинаа во напад со нож во Солинген за кој беше обвинет барател на азил од Сирија.
Осомничениот тврдел дека бил инспириран од групата Исламска држава.
Во јуни, во напад кој му се припишува на авганистански имигрант загина полицаец, а рани четворица други.
Граничните контроли го тестираат европското единство бидејќи некои ги гледаат како отстапување од слободното патување низ ЕУ.
Слободата на европските граѓани слободно да патуваат преку границите за работа и задоволство е еден од главните атрибути на ЕУ.
Според ЕУ, на земјите-членки им е дозволено привремено повторно да воведат контрола на внатрешните граници на ЕУ во случај на сериозна закана, како што е внатрешната безбедност.
Но, исто така, доктрината е дека граничните контроли треба да се применуваат како последно средство во исклучителни ситуации и мора да бидат временски ограничени.
Ваквите ограничувања често се воспоставуваат за време на големи спортски настани, на пример, Олимписките игри или Европското фудбалско првенство.
Владата на канцеларот Олаф Шолц воведе гранични контроли во обид да ја сузбие илегалната имиграција, откако екстремната десница помина добро на двата неодамнешни локални избори во источна Германија.