Словачкиот премиер Роберт Фицо изјави денеска дека земјата нема да ги блокира конечните одлуки од самитот на ЕУ, доколку дискусијата вклучи барање за решавање на обновувањето на транзитот на гас преку Украина.
„Мислам дека е разумно да се спомене потребата да се најде решение за обновување на транзитот на гас со учество на Европската комисија, Украина и Словачка. Доколку конечните одлуки вклучуваат таква формулација, немаме причина да не ги поддржиме“, рече Фицо на седницата на Комитетот за европски прашања, пред да отпатува на самитот на ЕУ во Брисел, пренесе ТАСР.
Премиерот, исто така, призна дека некои членки на ЕУ можеби се против барањата на Словачка и истакна дека има земји кои „отворено сакаат војната да продолжи“.
„Морам да очекувам значителни несогласувања околу барањето за обновување на транзитот. Гледам како некои мислат дека полудевме“, додаде Фицо.
Тој посочи дека економските податоци јасно ја покажуваат потребата од обновување на транзитот на гасот.
Фицо нагласи дека Словачка нема да поддржи воена помош за Украина, но и дека нема да ги блокира билатералните договори меѓу Украина и земјите-членки на ЕУ.
Словачкиот премиер денеска ќе отпатува за Брисел на вонреден самит на ЕУ, на кој лидерите на ЕУ ќе разговараат за актуелната ситуација во Украина, а на дневен ред ќе биде и темата за европската одбрана, со цел Унијата да се направи посуверена и подобро опремена за справување со сегашните и идните безбедносни предизвици, пренесе агенцијата.
Фицо најави дека клучна тема за Словачка во преговорите ќе биде обновувањето на транзитот на гас.