Европската унија е подготвена да ја зајакне соработката со Филипините за поморската безбедност, изјави во понеделник претседателката на Европската комисија Урсула фон дер Лајен, нагласувајќи ја важноста на слободен и отворен индо-пацифички регион, пренесува Ројтерс.
Таа го изјави ова по состанокот со филипинскиот претседател Фердинанд Маркос Јуниор во Манила, каде што двајцата лидери разговараа за низа прашања од безбедноста и трговијата до климатските промени.
– Подготвени сме да ја зајакнеме соработката со Филипините за поморската безбедност во регионот преку размена на информации, спроведување на проценка на заканите и градење на капацитетите на вашата крајбрежна стража – рече таа на заедничката прес-конференција со Маркос.
Филипините се предмет на геополитичко ривалство меѓу САД и Кина, со нивната поморска територија што опфаќа дел од Јужното Кинеско Море, стратешки и богат воден пат над кој Кина исто така тврди дека има суверенитет.
Фон дер Лајен во понеделникот ја потврди поддршката на ЕУ за меѓународната арбитражна одлука од 2016 година, која ги отфрли експанзивните барања на Пекинг, велејќи дека пресудата е правно обврзувачка и обезбедува основа за мирно решавање на споровите.
Но, Кина, чии „агресивни“ акции во Јужното Кинеско Море беа предмет на стотици дипломатски протести поднесени од Филипините, не ја признава пресудата.
– Индо-пацифик без закани со принуда е клучен за нашата стабилност, нашиот мир и просперитетот на нашиот народ – рече Фон дер Лајен, чија посета на Манила беше прва посета на претседателот на Европската комисија по речиси шест децении.