Европа е „наш сојузник“, но не може да биде „постојан вазал“ на САД во однос на безбедноста и трговијата, изјави американскиот потпретседател Џеј-Ди Венс во вторникот во интервју за британската веб-страница UnHerd.
„Сметаме дека Европа е наш сојузник. Ние едноставно сакаме сојуз во кој Европејците ќе бидат малку понезависни, а тоа ќе влијае на нашата безбедност и трговските односи“, рече Венс, кој постојано ги напаѓа европските лидери.
„Не е добро за Европа и не е во интерес на Америка Европа да биде постојан вазал на САД во однос на безбедноста“, посочи тој.
Откако се врати во Белата куќа, Доналд Трамп ги повика Европејците да трошат повеќе за сопствената одбрана и остро ја критикуваше Европската унија, обвинувајќи ја дека води нефер трговска политика кон САД.
И Венс постојано ги критикуваше европските лидери, велејќи во февруари во говорот одржан во Минхен дека тие не се борат доволно цврсто против имиграцијата и дека слободата на говор е под закана во Европа.
„Реалноста е – брутално е да се каже, но вистина е – дека целата европска безбедносна инфраструктура е субвенционирана од Соединетите Американски Држави уште од моето раѓање“, ја осуди Џ.
Тој додаде дека „со исклучок на Франција, Обединетото Кралство и Полска, повеќето европски земји немаат армија способна да гарантира разумна одбрана“.
На почетокот на март тој ги шокираше Европејците со изјавата дека за Украина, склучувањето економски договор со САД ќе биде „подобра гаранција за безбедноста од 20.000 војници од земја која не била во војна 30 или 40 години“.
„Не мислам дека понезависна Европа е лоша работа за САД“, посочи тој, велејќи дека верува оти посилна Европа во минатото можела да ја избегне „стратешката катастрофа“ на војната што во 2003 година во Ирак ја започна коалицијата предводена од САД.
Осврнувајќи се на преговорите меѓу Лондон и Вашингтон за склучување билатерален економски договор, Венс рече дека тие имаат „добри изгледи“ да резултираат со „одличен договор што ќе биде во најдобар интерес за двете земји“.