Најмалку 42 лица загинаа во конфликтот меѓу локалните заедници во источниот дел на Чад, соопштија официјални лица, а пренесува агенцијата АФП.
Насилството избило во саботата во регионот Вади Фира, по расправија за бунар меѓу две семејства.
„Конфликтот избувна поради расправија за бунар меѓу две семејства кои живеат во областа. Најмалку 42 лица загинаа“, рече владиниот претставник во потпрефектурата Гереда, Брахим Иса Галмаје.
Според првите информации повеќе од десет лица се повредени и тие се пренесени во локалните болници.
На местото на настанот се испратени министри, високи локални функционери и началникот на Генералштабот, додека надлежните тврдат дека ситуацијата во моментов е под контрола.
„Ситуацијата е и останува под контрола“, рече вицепремиерот задолжен за територијална администрација и децентрализација, Лимане Махамат, во телевизиско обраќање.
Источниот дел на Чад со години е погоден од конфликти меѓу заедниците, најчесто меѓу домородните фармери и номадските сточари, кои се борат за пристап до земја, вода и добиток.
Регионот е дополнително дестабилизиран поради неговата близина до Судан разурнат од војна.
Според податоците на невладината организација International Crisis Group, конфликтите меѓу земјоделците и сточарите во периодот од 2021 до 2024 година однеле повеќе од 1.000 животи, а околу 2.000 луѓе биле повредени.
Сличен инцидент се случи лани во ноември во регионот Хаџер-Ламис во централен Чад, кога најмалку 33 лица загинаа во судирите за пристап до бунар.
Безбедносната ситуација дополнително се комплицира со приливот на бегалци од Судан, каде што избувна граѓанската војна во април 2023 година.
Речиси еден милион луѓе од вкупно 12 милиони раселени во Судан се засолниле во соседен Чад.