Ако Русија оцени дека НАТО е слаб, би можела да биде подготвена да води „војна од големи размери“ во Европа во рок од пет години, објави Данската одбранбена разузнавачка служба (ДДИС), пренесува Политико.
„Русија најверојатно ќе биде поподготвена да употреби воена сила во регионална војна против една или повеќе европски земји на НАТО, ако оцени дека НАТО е воено ослабен или политички поделен“, се вели во извештајот објавен вчера.
„Ова е особено веројатно ако Русија оцени дека САД не се во можност или не сакаат да ги поддржат европските земји на НАТО во војна со Русија“, продолжува извештајот, нагласувајќи дека Русија ги засилува своите воени капацитети за да се подготви за можна војна против НАТО.
Ажурираната проценка на заканата од DDIS доаѓа додека американскиот претседател Доналд Трамп се обидува да стави крај на војната во Украина, која влегува во својата четврта година овој месец.
Агенцијата нуди три сценарија кои би можеле да се случат доколку конфликтот во Украина престане или замрзне, почнувајќи од претпоставката дека Русија нема капацитет да води војна со повеќе земји истовремено.
„Сеопфатен напад врз Европа“
Според проекциите во ажурирањето, Русија би можела да води локална војна со погранична земја во рок од шест месеци, додека би можела да започне регионална војна во регионот на Балтичкото Море во рок од две години.
За пет години, може да изврши напад од големи размери врз Европа, под услов САД да не се вмешаат.
Агенцијата забележува дека не го земала предвид можното зголемување на одбранбените капацитети на НАТО.
Трамп ги повика членките на НАТО да ги зголемат трошоците за одбрана на 5 отсто од БДП, што е повеќе од двојно од сегашната цел, и посочи дека САД би можеле да се повлечат од воената алијанса доколку нивните сојузници не ги исполнат своите финансиски обврски.
Трамп минатата година рече дека ќе ја „охрабри“ Русија да ја нападне секоја членка на НАТО што нема да ги исполни своите финансиски обврски.