Бугарската министерка за надворешни работи Велислава Петрова синоќа објави дека нападот со беспилотни летала врз два комерцијални брода во ексклузивната економска зона на Бугарија е неприфатлив и покажува дека безбедноста на Црното Море е директно поврзана со европската безбедност, објавија локалните медиуми.
Петрова, во објава на мрежата X, го опиша нападот како сериозно кршење на меѓународното право и принципите на безбедна пловидба, велејќи дека инцидентот оди подалеку од поморската безбедност и ја покажува важноста на Црното Море за целокупната безбедност на Европа, објавува порталот „Новините“.
Петрова рече дека заштитата на цивилните екипажи и слободата на пловидба во Црното Море мора да останат приоритет и нагласи дека овие прашања се важни „за нашите партнери ширум светот кои се потпираат на безбедна испорака на витални стоки од регионот на Црното Море“.
„Ова претставува уште еден чекор во опасната ескалација на војната во Украина. Мора да ги поддржиме сите можни дипломатски напори за завршување на оваа војна“, рече Петрова, додавајќи дека одржува близок контакт со европските партнери и сојузниците на Бугарија во НАТО.
Бугарскиот премиер Румен Радев го осуди нападот врз два трговски брода погодени од дронови во ексклузивната економска зона на Бугарија во Црното Море претходно вчера како „целосно неприфатливо“ кршење на меѓународното право и поморските норми.
Инцидентот се случил околу три часот наутро, 110 километри источно од Бјала, град на бугарскиот брег на Црното Море, кога бродовите биле нападнати од поморски и воздушни дронови.
Претседателката на Бугарија, Илијана Јотова, за денес го свика Консултативниот совет за национална безбедност (НСБ) за да разговара за поморската безбедност и критичната инфраструктура на Бугарија по нападот со дронови врз два комерцијални брода во Црното Море, објави Претседателството во Софија синоќа, објави претходно „Новините“.
Средбата е закажана за 13 часот во Претседателството и ќе се фокусира на „тековните ризици и закани за поморската безбедност и критичната инфраструктура на Бугарија во контекст на војната во Украина“.