Бразилската федерална полиција достави документи до Врховниот суд во кои тврди дека поранешниот претседател на земјата, Жаир Болсонаро, планирал да избега во Аргентина за да избегне судење за наводно планирање воен удар, пишува „Гардијан“.
Во извештај од 170 страници, полицијата соопшти дека документот е пронајден во телефонот на Болсонаро во февруари 2024 година, два дена откако му бил конфискуван пасошот.
Документот, наводно нацрт-барање за политички азил, е адресиран до аргентинскиот претседател Хавиер Мајли и го опишува Болсонаро како „политички прогонувано лице“.
Извор од аргентинската влада изјави дека писмото не е примено.
Болсонаро се соочува со повеќе од 40 години затвор по обвиненијата дека се обидел да ги поништи резултатите од претседателските избори во 2022 година, кои ги загуби од Луиз Инасио Лула да Силва.
Тој ги негира обвиненијата, но правните експерти веруваат дека неговата пресуда е речиси сигурна.
Федералната полиција, исто така, ги обвинува Болсонаро и неговиот син Едуардо дека се обидуваат да влијаат на исходот од судењето со лобирање кај американските претставници.
Едуардо Болсонаро беше во САД, каде што, со поддршка на американскиот претседател Доналд Трамп, се обиде да изврши притисок врз Врховниот суд на Бразил, објави Танјуг.
Во јули, царините на Трамп за бразилскиот увоз и санкциите против судиите на Врховниот суд предизвикаа критики во Бразил, додека анкетите покажуваат дека поддршката за Лула е зголемена, при што повеќе од 70 проценти од Бразилците се спротивставуваат на притисокот од САД.
Како дел од истрагата, полицијата откри и внатрешни пресметки во тимот на Болсонаро, вклучувајќи расправии меѓу Жаир, Едуардо и евангелистичкиот пастор Силас Малафаја, кој исто така е под истрага и му е забрането да ја напушти земјата, пишува Гардијан.