Северна Кореја денес испали неколку ракети во правец на Источното Море, објави Здружениот генералштаб на јужнокорејската армија.
Ракетите беа лансирани рано утрово од областа Сондок во покраината Јужен Хамгјонг, соопшти Здружениот генералштаб, додавајќи дека е во тек понатамошна анализа на нивните карактеристики, во координација со САД, пренесува Јонхап.
„Нашата војска ги следи различните активности на Северна Кореја во рамките на силниот заеднички одбранбен систем на Јужна Кореја и САД и ја одржува способноста и подготвеноста решително и енергично да одговори на секоја провокација“, се вели во соопштението.
Службеник на Здружениот генералштаб изјави дека деталите се анализираат, оставајќи ја отворена можноста Северна Кореја да лансирала различни видови ракети истовремено.
Ова последно лансирање се случи само неколку дена откако Пјонгјанг испали десетина балистички ракети со краток дострел кон Источното Море од областа Вонсан во четврток.
Јонхап, исто така, забележува дека помина помалку од една недела откако јужнокорејската војска предложи воени разговори со Пјонгјанг во врска со меѓукорејската граница.