Американскиот државен секретар Ентони Блинкен изјави денеска дека палестинската милитантна група Хамас регрутирала речиси исто толку милитанти колку што изгубила во израелските напади.
„Секогаш кога Израел ги завршува воените операции и се повлекува, милитантите на Хамас се прегрупираат и се враќаат“, рече Блинкен во Атлантскиот совет, тинк-тенк со седиште во Вашингтон, објави Блумберг.
Тој оцени дека способноста на Хамас да продолжи да регрутира борци е „рецепт за постојан бунт и вечна војна“.
Според него, континуираниот капацитет на милитантната група да ги пополни своите редови е една од причините зошто САД продолжуваат да вршат притисок врз израелската влада да влезе во прекин на огнот што на крајот ќе доведе до крај на конфликтот во Газа.
Блинкен рече дека администрацијата на американскиот претседател Џозеф Бајден долго време инсистира на тоа дека терористичката група Хамас не може да биде победена сама воено.
Во последните денови се зголемија надежите дека двете страни се на работ на договор за прекин на борбите што започнаа кога Хамас го нападна Израел, наведува американската агенција.
Блинкен рече дека договорот е „поблизок од кога било досега“ и укажа на работата на администрацијата на Бајден на повоениот план за Газа, стратегија која, како што рече, „може или не може да биде усвоена“ од администрацијата на новоизбраниот претседател Доналд Трамп.