Турција денеска ги критикуваше западните земји кои привремено ги затворија своите конзулати во Истанбул, загрижени за нивната безбедност поради можни одмазднички напади по палењето на Куранот на протестите во европските земји.
Турскиот министер за внатрешни работи Сулејман Сојлу рече дека затворањето на конзулатите и предупредувањата за патување во Турција се дел од, како што рече, заговорот на Западот да му наштети на закрепнувањето на турскиот туризам по пандемијата на коронавирус и ги обвини западните земји за психолошка војна.
Сојлу истакна дека на денот кога Турција ја објави својата цел да привлече 60 милиони туристи, западните земји беа на работ да започнат нова психолошка војна против Анкара.
Сојлу потсети дека досега оваа година Турција извршила дури 60 операции против Исламската држава и привела 95 лица.
Околу 2.000 осомничени за ИД беа уапсени во Турција во повеќе од 1.000 операции против групата минатата година, рече Сојлу.
Турското Министерство за внатрешни работи соопшти претходно оваа недела дека турските власти уапсиле неколку осомничени по предупредување од „пријателска земја“, но не пронашле оружје или муниција и дека нема знаци дека се планирани напади.
Германија, Холандија и Велика Британија се меѓу земјите кои неделава ги затворија своите конзулати во Истанбул, наведувајќи го ризикот од можни одмазднички напади по палењето на Куранот во Шведска, Холандија и Данска.
Во меѓувреме, САД и некои други земји издадоа предупредувања за патување на нивните граѓани во Истанбул, повикувајќи се на претпазливост.
Во бомбашкиот напад во Истанбул во ноември загинаа шест лица, а неколку беа ранети на авенијата Истиклал, популарна туристичка дестинација, а турските власти ги обвинија курдските милитанти за нападот.