Австралискиот премиер Ентони Албанес го поддржа предлогот за враќање на основачот на Викиликс Џулијан Асанж во земјата, пред сослушувањето за неговата екстрадиција во САД следната недела во Лондон, и го повика Вашингтон да се откаже од екстрадицијата и да го ослободи Асанж.
За таквиот предлог на независниот пратеник Ендрју Вилки, Долниот дом на австралискиот парламент во средата гласаше за враќање на Асанж во Австралија со 86 „за“ и 42 „против“, откако предлогот беше поддржан од лабуристичката влада, пренесе Ројтерс.
Вилки рече дека тоа е „силен политички сигнал испратен до британската и американската влада“. Американските власти бараат Британците да го екстрадираат Асанж.
Тој во моментов е во британски притвор и е обвинет од американските судови за објавување на доверливи американски воени и дипломатски досиеја од страна на Викиликс.
Британците се согласија на негова екстрадиција, а Австралиецот Асанж ги искористи последните правни средства за да се обиде да ја спречи.
Јавната расправа ќе се одржи на 20 и 21 февруари кога двајца судии ќе ја разгледаат претходната пресуда со која Асанж не може да се жали.
Вилки најави дека ќе отпатува за Лондон на сослушувањето.