Единствениот познат преживеан примерок од осигурителната книга што го покриваше челичниот труп на легендарниот брод „Титаник“ за време на неговите морски проби ќе биде понуден на продажба на претстојната аукција, пишува Би-Би-Си.
Овој историски документ е сертификат за осигурување вреден 100.000 долари во тоа време – што би било приближно 3,5 милиони долари во денешна вредност.
Полисата е издадена од Atlantic Mutual, еден од главните осигурители на море и некогаш најголемата компанија за поморско и општо осигурување во Северна Америка.
Документот ќе биде понуден на аукција во аукциската куќа Henry Aldridge & Son во Девизес, Вилтшир, Англија, на 21 ноември 2026 година, со проценета вредност помеѓу 30.000 и 50.000 фунти.
Овој исклучително редок документ е потпишан на 27 март 1912 година, само 19 дена пред бродот да потоне на своето прво патување кон Њујорк, одземајќи ги животите на 1.500 луѓе.
Клиент на американската компанија „Атлантик Мјучуал“ била компанијата „Оушн Стим Навигација“, матичната компанија што го поседувала „Титаник“.
Се верува дека оваа куќа, како дел од осигурителен конзорциум во тоа време, обезбедила поголема покриеност за несреќниот брод од кој било друг поединечен осигурител.
По една од најголемите поморски катастрофи во историјата, лимитите од оваа полиса и целосната штета биле исплатени во рекордно време од само 30 дена од денот на потонувањето.
Она што ја прави оваа полиса единствено сведоштво за транспортот на бродот до неговото матично пристаниште е рачно напишаниот додаток на самиот документ, со кој е осигуран бродот пред да ги прими своите први патници.
Ракописната белешка гласи: „Вклучувајќи патување од Белфаст до Саутемптон на или по 31 март 1912 година, во 19:00 часот, и ризикот од проби на споменатото патување, доколку ги имало.“
Оваа белешка гарантирала дека бродот бил целосно заштитен за време на испораката во пристаништето и за време на пробните возења, што го прави документот уникатен запис за безбедноста на бродот пред комерцијалната употреба.
На аукциската страница се вели дека документот нема рамен во историјата на колекционерството, бидејќи немало регистриран случај на продажба на оригиналната полиса за самиот „Титаник“, а камоли онаа издадена од неговиот главен осигурител.
Покрај својата улога во приказната за потонувањето на најпознатиот прекуокеански брод, компанијата „Атлантик Мјучуал“ остави значаен белег во историјата преку исплатата на надоместоци поврзани со терористичките напади на 11 септември во Њујорк.
Основана во далечната 1838 година, оваа осигурителна компанија ги надмина големите историски кризи и прерасна во гигант на поморскиот бизнис.
Сепак, век и половина по нејзиното основање, работењето на компанијата доживеа колапс, како резултат на што нејзините работни дозволи беа одземени, а целиот систем беше официјално испратен во ликвидација во 2011 година.
Аукцијата во Вилтшир претставува не само продажба на артефакт од брод, туку и последно материјално сеќавање на некогаш моќна институција која ја напиша финансиската позадина на најголемите светски трагедии.