Суд во Кенија денес го осуди водачот на секта Пол Мекензи на вкупно 200 години затвор за убиство на 191 лице, од кои 190 биле деца, јавуваат агенциите.
Судијката на Високиот суд, Дијана Кавеџа, за време на изрекувањето на пресудата изјави дека Мекензи носи „примарна кривична одговорност“ за организирање на масовното гладување во шумата Шакахола.
Мекензи, основач на Меѓународната црква на добрата вест, беше прогласен за виновен за 191 обвинение за убиство.
Судот го осуди на 100 години затвор за 183 „ужасни убиства“ предизвикани од глад, како и уште 100 години за осум убиства со директно насилство, а тие две казни од 100 години ќе бидат издржувани истовремено.
Трагедијата беше откриена во 2023 година кога истражителите пронајдоа масовни гробници на имот од 800 хектари во шумата Шакахола, од каде што досега се ексхумирани повеќе од 400 тела на следбеници на култот.
Макензи ги убедил своите следбеници да ги продадат своите имоти, да се откажат од образованието и медицинската нега и да се изгладнат себеси и своите деца до смрт за да го „сретнат Исус“ пред крајот на светот.
За време на судската постапка, беше утврдено дека култот имал строга „хиерархија на смртта“, што значи дека вооружени чувари ги тепале или задавувале оние што се обидувале да го прекинат постот или да избегаат од комплексот.
28 од неговите следбеници кои работеле како чувари и гробари беа осудени заедно со Макензи.
Водачот на култот сè уште е на судење во одделни судења за тероризам, радикализација и суровост кон деца.