Соединетите Американски Држави јавно потврдија за прв пат дека распоредиле вселенско оружје во орбитата на Земјата, велејќи дека е потребно за да се заштитат американските сили од непријателски дејствија, објави Би-Би-Си.
Секретарот на американските воздухопловни сили, Трој Мајнке, на Конференцијата за воздухопловство, вселена и сајбер-простор изјави дека оружјето „во орбитата“ е дел од одговорот на САД на „развојните закани“, но не прецизираше за какви капацитети станува збор или кога оружјето е ставено во орбитата.
Американските воени претставници претходно најавија зајакнување на воените капацитети во вселената, посочувајќи ги руските и кинеските програми насочени кон развој на капацитети за напад и блокирање на американските сателити.
Администрацијата на американскиот претседател Доналд Трамп изјави дека вселенските капацитети, заедно со пресретнувачките ракети, се клучен дел од планираниот систем за воздушна одбрана „Златна купола“, дизајниран да ги заштити САД од ракети и други воздушни закани.
Договорот за вселената од 1967 година забранува поставување оружје за масовно уништување во орбитата, додека САД, Русија и Кина оттогаш развија други капацитети за дејствување против сателити, вклучително и блокирање или уништување на истите.
Американските вселенски сили, најновата генерација на американската војска, беа формирани во 2019 година за да ги заштитат американските средства во вселената, вклучувајќи ги и сателитите што се користат за комуникации и надзор.
Портпаролот на американските вселенски сили изјави дека „контролата на вселената“ вклучува употреба на кинетички и некинетички средства за влијание врз способностите на противникот, вклучувајќи попречување, деградација и, кога е потребно, уништување.
„Овие способности можат да се користат за офанзивни и одбранбени цели како што е наведено од борбените команди“, додаде портпаролот.
Според американските претставници, два руски сателити на почетокот на февруари веројатно ги пресретнале комуникациите на најмалку десетина европски сателити од почетокот на војната во Украина во 2022 година.
Во 2024 година, САД, исто така, објавија дека Русија лансирала сателит за кој веруваат дека би можел да биде способен да нападне други сателити, според Танјуг.