Трет ден пожарите зафатија неколку области од Грција, а најтешка е ситуацијата во јужен Ретимно, Крит, каде пожарникарите, поддржани од бројни сили, се обидуваат да го контролираат главниот фронт во областа Аја Параскеви, додека нов пожар избувна во Аркадија.
Пожарот на Парос повторно се разгорува, објави Прототема.
Според информациите од Координативниот центар, гаснењето на пожарот во Ретимно е отежнато од силните ветрови и непристапниот терен, поради што има постојано повторно појавување на пожари и нивно ширење.
На терен се распоредени бројни противпожарни екипи од целиот регион на Крит, вклучувајќи пешадиски единици и членови на специјални противпожарни екипи, кои со поддршка на копнена механизација се обидуваат да го стават пожарот под контрола.
Во гаснењето учествуваат и жителите на погодените села, волонтери, како и цистерни за вода и градежни машини на локалните самоуправи од Агиос Василиос, Амари, Ретимно и јужните делови на Ираклион.
Поради многу високиот ризик од нови пожари, властите воведоа привремена забрана за сообраќај и престој на граѓаните во одредени шумски области на Патрас.
Забраната важи од 21:00 до 06:00 часот наутро и се однесува на неколку шумски патишта и заштитени зони, додека постојаните жители, вработените, сопствениците на земјиште, сточарите и луѓето што ги користат главните патни правци се ослободени од неа.
Нов пожар избувна во шумската област Фалаиси, во општината Мегалополис во Аркадија.
Според податоците на противпожарната служба, пожарот е пријавен околу 23.10 часот, а на терен биле распоредени 48 пожарникари, три пешадиски единици и 12 противпожарни возила.