Американската технолошка компанија Apple планира да им понуди на корисниците можност за изнајмување iPhone уреди по месечна цена од 17,99 долари (околу 15,5 евра), во соработка со шведската фирма за финансиски технологии Klarna, објави денес CNBC.
Според тој медиум, корисниците би можеле да добијат нов iPhone со фиксна месечна претплата, без потреба од еднократно купување на уред или класичен договор со мобилен оператор.
Моделот би се базирал на принципот на претплата, при што Apple ќе го задржи сопствеништвото на уредот, додека Klarna би обезбедувала финансирање и би управувала со месечните плаќања.
Овој потег е продолжение на стратегијата на Apple за развој на услуги базирани на претплата и би можел да им го олесни на корисниците редовното менување уреди за понови модели, со пониски почетни трошоци.
Apple претходно размислуваше за воведување на модел на претплата за iPhone, но проектот не беше реализиран во планираниот период.
Партнерството со Klarna би можело да ѝ овозможи на компанијата да го забрза неговото спроведување и дополнително да ги зголеми приходите од услугите.
Медиумите објавуваат дека засега не е познато на кои пазари програмата ќе биде понудена прво, ниту кога би можела официјално да биде претставена.