Австралија во петокот го потврди првиот случај на смртоносниот вирус на птичји грип H5N1 кај домашна морска птица, со што епидемијата во земјата влезе во нова фаза откако вирусот стигна до австралиските брегови минатиот месец.
Лабораториските тестирања спроведени од Австралиската национална научна агенција ја потврдија инфекцијата кај гребенестиот римка пронајден во крајбрежниот град Роуб во сојузната држава Јужна Австралија, изјави министерката за земјоделство Џули Колинс, пренесува Ројтерс.
Ова е прв потврден случај на инфекција кај австралиска морска птица, додека сите претходни случаи беа регистрирани кај птици преселници.
Со ова вкупниот број на потврдени случаи во Австралија се искачи на 12, откако властите потврдија уште две инфекции во Јужна Австралија и една во Западна Австралија во петокот.
– Нашите научници спроведуваат дополнителни истражувања за да го утврдат можниот пат по кој била заразена австралиската морска птица – рече Колинс.
Таа додаде дека станува збор за крајбрежна птица чие живеалиште се преклопува со областите населени со птици преселници каде што претходно беше потврден вирусот H5.
Во јуни, Австралија стана последниот континент на кој беше потврден случај на вирусот H5N1 на копно, иако вирусот веќе беше откриен кон крајот на 2025 година на субантарктичката територија на островот Херд, на околу 4.100 километри од копнената Австралија.