Ирска го презеде ротирачкото претседателство со Советот на Европската Унија за втората половина од 2026 година, а во текот на следните шест месеци фокусот ќе биде на зајакнување на европската конкурентност, заштита на демократските вредности и безбедноста во сè понестабилна глобална средина.
Претседателството на Ирска ќе трае од јули до декември 2026 година и ќе се одвива под мотото „Силата во единството“/„Ní neart go cur le chéile“.
Тоа ќе биде осмото претседателство на Ирска со Советот на ЕУ, откако претходно ја извршуваше функцијата во 1975, 1979, 1984, 1990, 1996, 2004 и 2013 година.
Претседателството со Советот на ЕУ ротира меѓу земјите-членки на секои шест месеци.
Земјата-претседавач води состаноци на сите нивоа во Советот, ги води преговорите, се стреми да посредува во договорите меѓу земјите-членки и помага во донесувањето европски закони и политики што влијаат на повеќе од 450 милиони граѓани.
Со преземањето на претседателството, Ирска го означи и почетокот на ново 18-месечно трио претседателства, заедно со Литванија и Грција.
Програмата на ирското претседателство се заснова на три столба – конкурентност, вредности и безбедност.
Даблин најавува дека ќе работи на зајакнување на европската економија преку иновации и инвестиции, зачувување на демократските принципи и социјалната кохезија и зголемување на отпорноста на ЕУ на геополитичките, економските и безбедносните предизвици.
Посебен приоритет ќе биде постигнувањето навремен договор за новата повеќегодишна финансиска рамка на ЕУ за периодот од 2028 до 2034 година.
Ирска верува дека Унијата мора да има стабилна финансиска основа за да се справи со идните предизвици, со континуирана поддршка за клучните политики, вклучувајќи ја Заедничката земјоделска политика и Кохезиската политика.
Во областа на конкурентноста, Ирска најавува дека ќе се потпира на патоказот „Една Европа, еден пазар“ договорен од Советот, Европската комисија и Европскиот парламент, со цел зајакнување на продуктивноста, иновациите и економскиот просперитет на ЕУ.
Кога станува збор за вредности, Ирска вели дека ќе се залага за зачувување на основните принципи на Унијата, вклучувајќи го почитувањето на човековото достоинство, слободата, демократијата, еднаквоста, владеењето на правото и човековите права, вклучувајќи ги и правата на припадниците на малцинствата.
Безбедноста исто така ќе биде еден од централните приоритети на претседателството.
Во програмата се наведува дека руската агресија врз Украина, конфликтите на Блискиот Исток и Заливот, како и новите закани и новите форми на војување, претставуваат сериозни предизвици за Европа.
Даблин, исто така, најавува работа за зајакнување и стабилизирање на односите на ЕУ со нејзините соседи и глобални партнери, вклучувајќи ги Обединетото Кралство и Соединетите Американски Држави.
Во областа на здравството, Ирска ќе ги третира здравствените иновации како дел од пошироката европска агенда за конкурентност.