Повеќе од три децении по повторното обединување на Германија, големи делови од источниот дел на земјата продолжуваат да се соочуваат со намалување на населението, недостиг на работна сила и растечко политичко незадоволство.
Во 35-те години по обединувањето, вкупното население на Германија се зголеми за 3,8 милиони, или за пет проценти, главно благодарение на имиграцијата.
Сепак, во петте федерални држави што некогаш ја сочинуваа Германската Демократска Република, со исклучок на Источен Берлин, бројот на жители се намали за 16 проценти, пишува Би-Би-Си.
Најголемото намалување е забележано во федералната држава Саксонија-Анхалт, каде што се наоѓа градот Ошерслебен, каде што бројот на жители се намалил за 26 проценти, според официјалните податоци објавени минатата година.
Во руралните делови на источна Германија, се очекува намалувањето на населението да продолжи, бидејќи последиците од заминувањето на млади и образовани луѓе по повторното обединување се комбинирани со ниска стапка на наталитет.
Според проекциите на германските демографи, најсилниот пад се очекува токму во помалку урбанизираните делови на истокот, додека Бранденбург се издвојува како исклучок поради неговата близина до Берлин.
Федералниот завод за статистика на Германија проценува дека до 2070 година, земјата веројатно ќе има помалку луѓе, додека за источните покраини надвор од Берлин се предвидува пад на населението во сите сценарија.
Демографските промени се поврзани и со растот на поддршката за партијата Алтернатива за Германија (AfD), која во Саксонија-Анхалт е класифицирана како десничарска екстремистичка организација од страна на домашната разузнавачка служба.
По падот на Берлинскиот ѕид во 1989 година, на многу компании во поранешна Источна Германија им беше тешко да се прилагодат на пазарната економија, додека бројни компании пропаднаа или драстично ги намалија своите операции.
По ова следеше масовно заминување на населението кон западот на земјата, особено младите, високообразовани луѓе и жени.
Социологот Катја Саломо од Универзитетот во Касел, која пораснала во рурален дел од источна Германија, наведува дека вториот бран на миграција на почетокот на овој век бил со помал обем, но особено значаен бидејќи млади и образовани луѓе заминале.
Помал број жени значел и помал број деца, што дополнително го продлабочило демографскиот пад.
Денес, феномен познат како Китастербен, односно затворање на градинките поради недостаток на деца, се забележува и во источна Германија.
Во Ошерслебен, град со околу 19.000 жители, вклучувајќи ги и околните села, Јан-Никлас Хустед, роден во 1989 година неколку недели пред падот на Берлинскиот ѕид, се обидува да придонесе за враќањето на младите семејства.
По 13 години живот надвор од родниот град, тој се вратил во Ошерслебен и сега укажува на потребата од борба против недостатокот на квалификувана работна сила.
Намалувањето на населението, покрај недостатокот на работници, доведува и до намалување на достапноста на услуги како што се продавници, породилишта, училишта и градинки.
Посебен предизвик е стареењето на населението, кое има потреба од социјални и здравствени услуги.
Иако Германија во последните години прими голем број мигранти и бегалци од Украина, Сирија, Турција и други земји, повеќето од нив се населиле во големи градови како што се Берлин и урбанизираните западни делови на земјата.
Германија истовремено се соочува со општо стареење на населението и ниска стапка на наталитет.
Прелиминарните податоци покажуваат дека минатата година бројот на раѓања бил најнизок од 1946 година.