Топлотниот бран што ја зафати Европа во последните денови продолжува да руши температурни рекорди.
Во петокот највисоките јунски температури беа забележани во Германија, Белгија и Холандија, додека бројот на смртни случаи поврзани со жештините се зголеми во Шпанија и Франција.
Поради опасност по здравјето на граѓаните, властите ги откажаа концертите, спортските настани и другите народни собири.
Во петокот Германија ја забележа највисоката измерена температура од 41,3 степени целзиусови.
Рекордот, според привремените податоци, е измерен во Сарбрикен, недалеку од француската граница, пишува Би-Би-Си.
Иако топлотниот бран во Франција го достигна својот врв и постепено слабее, министерката за здравство Стефани Рист предупреди дека особено загрижува зголемениот број на смртни случаи во приватните домаќинства.
Портпаролот на Светската метеоролошка организација Клер Нулис предупреди дека ваквите екстремни временски услови ќе имаат „сериозни последици по здравјето на луѓето, екосистемите, земјоделството и пазарот на трудот“.
Таа додаде дека, за жал, мора да се навикнеме на се почести појави на вакви топлотни бранови.
Се очекуваат нови рекорди
Според пресметките на АФП, во петокот повеќе од 150 милиони луѓе ширум Европа биле изложени на температури повисоки од 35 целзиусови степени.
Чешките и австриските метеоролози очекуваат нови национални рекорди за време на викендот, додека Србија се прогнозира да достигне 39 степени.
Во Швајцарија, нуклеарната централа Безнау ги исклучи двата реактори од електричната мрежа бидејќи температурата на реката Ааре достигнала превисоко ниво за нивно безбедно ладење.
Научниците од организацијата World Weather Attribution велат дека температурите во Франција, Германија, Италија, Шпанија и јужна Англија се меѓу пет и 12 степени над сезонскиот просек поради долготрајниот систем со висок притисок.
Предупредуваат дека јуни грее побрзо од кој било друг месец и дека ова е најинтензивниот јунски топлотен бран во набљудуваното подрачје.
Европа брзо се загрева
Според податоците на климатската служба Коперник, Европа е континент кој се загрева двојно побрзо од светскиот просек.
Екстремните горештини предизвикаа и прекини во сообраќајот. Воз на Еуростар на линијата меѓу Келн и Париз се расипа источно од Брисел со околу 400 патници, а тројца од нив превентивно се превезени во болница.
Поради здравствени ризици, музичкиот фестивал Париз Прајд и Солидејс се откажани, додека атлетскиот собир од Дијамантската лига сепак ќе се одржи во прилагоден распоред.
Во Холандија фестивалот Defqon.1 е откажан по невидено црвено предупредување поради екстремни жештини, а во Германија полумаратонот во Хамбург е меѓу откажаните настани.
Францускиот министер за здравство предупреди дека екстремните временски услови речиси сигурно ќе доведат до дополнителен број смртни случаи, поради што е активиран кризен план за болниците во регионот на Париз.
Во Марсеј почина 18-месечно дете
Во Марсеј, 18-месечно дете почина откако беше пронајдено во автомобил со тешка хипертермија, додека во Франција од почетокот на топлотниот бран има 55 смртни случаи од давење, од кои повеќето во неконтролирани базени.
Шпанскиот MoMo систем помеѓу неделата и четвртокот забележа 327 смртни случаи кои би можеле да бидат поврзани со високите температури.
Иако жештините таму почнаа да се намалуваат, североисточно од Барселона избувна шумски пожар, кој принуди околу 16.000 жители да останат во своите домови, а полицијата уапси осомничен за подметнување на пожарот.
Во поголем дел од Европа не очекува значително освежување за време на викендот. Швајцарските научници предупредуваат дека до почетокот на следната недела глечерите ќе останат без зимски резерви на снег и ќе почнат брзо да губат маса, што обично се случува само во август.
Тие оценуваат дека овогодинешното топење може да биде меѓу најлошите откако има мерења.