По потпишувањето на меморандумот за разбирање меѓу Соединетите Американски Држави и Иран, дипломатската активност на САД ќе биде фокусирана на војната во Украина, изјави американскиот претседател Доналд Трамп.
„Вчера имавме многу добар разговор со претседателот Зеленски и претседателот Путин и гледам дека можеби можеме да направиме нешто, навистина мислам. Мислам дека двајцата се отворени за тоа. Знаете, сега кога ова (Иран) заврши, ќе се фокусираме на Украина“, рече Трамп, зборувајќи на конференција пред самитот на Г7 во Евиан, Франција, заедно со францускиот претседател Емануел Макрон, објави „Еуроњуз“.
Зеленски претходно изјави дека понудил средба на маргините на самитот на Г7 со Путин за да разговараат за завршување на четиригодишната војна, но дека рускиот лидер „не бил подготвен да разговара“.
„Испративме порака дека сме подготвени да се сретнеме со Путин за време на самитот на Г7, бидејќи ќе бидат присутни американскиот претседател Доналд Трамп и францускиот претседател Емануел Макрон, па Европејците плус Америка. Тоа е добра, мислам дека дури и многу добра можност сите да се сретнеме заедно“, рече Зеленски во разговор со новинарите.
Зеленски во неделата изјави дека за време на телефонскиот разговор со Трамп било договорено да продолжат разговорите за мировните иницијативи за Украина за време на самитот на Г7.
Тој рече дека за време на разговорот му посакал на Трамп „успех, пред сè во неговите напори да ја заврши војната на Русија против Украина“.