Шведскиот парламент усвои закон со кој им се дозволува на властите да ги одземат дозволите за престој на мигрантите поради таканаречено лошо однесување, вклучувајќи неплатени долгови, нелегална работа или врски со екстремистички организации.
Законот се однесува на барањата за дозволи за престој кои се во постапка, но и ретроактивно на веќе одобрените дозволи.
Владата, која ги доби изборите во 2022 година со ветувања за намалување на имиграцијата и порешителна борба против криминалот, тврди дека луѓето кои не се однесуваат според правилата или вршат кривични дела не треба да можат да останат во земјата, пишува Ројтерс.
Законот не прецизира целосно кои видови однесување се сметаат за неприфатливи, но владата претходно наведе неплатени долгови, неплаќање даноци, криминал и врски со екстремистички организации.
Шведската агенција за миграција ќе биде задолжена за преглед на дозволите за престој, а одлуките ќе можат да се оспорат пред миграциски суд.
Министерот за миграција, Јохан Форсел, претходно, за време на презентацијата на законот, изјави дека оние кои не се трудат да постапуваат правилно не можат да сметаат на останување во Шведска.
Опозицијата и организациите за човекови права го критикуваа законот како произволен, предупредувајќи дека одлуките можат да се донесуваат врз основа на некриминално однесување.
Организацијата „Заштитници на граѓански права“ со седиште во Стокхолм изјави дека законот ги остава луѓето несигурни за тоа какви дејствија или изрази можат да се користат против нив и дека го поткопува владеењето на правото и принципот на еднаквост пред законот.