За многу деветтоодделенци изборот на средно училиште претставува една од најважните одлуки – избор што ќе го одреди нивниот понатамошен развој, образование и кариера. Токму затоа, СОУ „Перо Наков“ и оваа година ги отвора вратите за новите генерации ученици, нудејќи современи образовни профили, практична настава и можност младите уште од средношколските денови да стекнат знаења и искуства кои ќе им бидат од огромно значење во иднина.
Со долгогодишна традиција, стручен наставен кадар и модерни образовни програми, училиштето е препознатливо како едно од најбараните средни стручни училишта во Куманово и регионот.
Посебен акцент се става на дуалното образование, кое им овозможува на учениците покрај теоретската настава да посетуваат и практична обука во компании, со што директно се подготвуваат за реалниот пазар на труд.
Во рамки на насоката Економија, право и трговија, учениците можат да се определат за профилот економски техничар (дуална паралелка), каде што ќе стекнат знаења од областа на економијата, сметководството, финансиското работење и бизнис организацијата. Овој профил е идеален за млади кои сакаат динамична професија и можност за работа во компании, банки, институции или отворање сопствен бизнис.
Интересен избор е и профилот бизнис администратор (дуална паралелка), кој ги подготвува учениците за современо канцелариско и административно работење, организација и комуникација во деловниот свет.
Современите трендови носат и нови професии, па така профилите техничар за е-трговија и дигитален маркетинг (дуална паралелка) стануваат сѐ поатрактивни кај младите. Учениците ќе учат како функционира онлајн продажбата, рекламирањето на социјалните мрежи, креирањето дигитални кампањи и современите маркетинг стратегии – вештини кои денес се едни од најбараните на пазарот.
За креативните ученици кои сакаат мода, дизајн и уметност, струката Текстил, кожа и слични производи нуди повеќе интересни насоки. Профилот техничар за изработка на облека (дуална паралелка) овозможува стекнување практични знаења за производство и моделирање облека, додека техничарот за дизајн на облека е вистински избор за младите кои сакаат да ја изразат својата креативност преку модата и дизајнот.
Во оваа струка се нуди и профилот техничар за обувки (дуална паралелка), каде учениците ќе се запознаат со процесите на производство, дизајн и обработка на обувки – професија со долга традиција и реални можности за вработување.
Посебно внимание привлекува и насоката Уметничко образование – графички дизајнер, која е наменета за талентирани и креативни ученици што сакаат да работат со визуелни комуникации, дигитален дизајн, фотографија, брендирање и современи графички решенија. Во време на дигитални медиуми и социјални мрежи, графичкиот дизајн претставува една од најперспективните и најкреативни професии.
За учениците кои спортот го гледаат како начин на живот, СОУ „Перо Наков“ нуди и Спортска академија – кошарка, каде младите спортисти ќе имаат можност паралелно да се образуваат и професионално да се развиваат во спортот.
Она што дополнително го прави училиштето атрактивно е можноста за стипендија во сите дуални паралелки, што претставува голема поддршка и мотивација за учениците кои ќе се определат за овие образовни профили.
СОУ „Перо Наков“ не е само училиште – тоа е место каде се создаваат идни економисти, дизајнери, маркетери, спортисти и успешни професионалци.
Со современо образование, практична работа и можност за личен развој, училиштето им нуди на младите сигурен чекор кон успешна иднина.
Изборот на средно училиште е избор на иднината – а можеби токму твојата иднина започнува во СОУ „Перо Наков“.
Никола Ивановски