Во СОУ „Перо Наков“ во Куманово утре, 13 мај, со почеток од 18 часот ќе се одржи „Еко модна ревија“, настан посветен на одржливата мода, креативноста и подигнувањето на свеста за влијанието на текстилната индустрија врз животната средина.
Под мотото „Одговорната мода започнува од она што веќе го имаме“, учениците организираат модна ревија која носи порака, а не само стил.
Преку реупотреба и редизајн на облека, учесниците ќе покажат како старите парчиња можат да добијат нов живот и нова вредност.
Во рамки на ревијата ќе бидат претставени четири тематски целини инспирирани од годишните времиња – пролет, лето, есен и зима.
Организаторите преку настанот сакаат да укажат и на негативното влијание на брзата мода врз природата, посочувајќи дека за производство на едно парче фармерки се трошат до 10.000 литри вода, а текстилната индустрија создава значителни емисии на јаглерод диоксид и загадување со пестициди и хемикалии.
„Биди дел од промената“, „Избери свесно“ и „Мисли одржливо“ се пораките кои ќе бидат испратени од ревијата, со цел да се поттикне поголема еколошка одговорност кај младите и пошироката јавност.
Настанот е поддржан од Министерството за образование и наука во рамки на унапредување на мултикултурализам и меѓуетничка интеграција во училиштата.
Никола Ивановски