Кинеските компании продолжуваат да ги снабдуваат Иран и Русија со мотори, микрочипови и други компоненти за производство на камикази дронови Шахед, во очигледна непочитување на санкциите на САД.
Според кинеската царина, компаниите во Кина испорачуваат стотици контејнери со компоненти до фабриките во Иран и Русија, пишува The Wall Street Journal.
На пример, „Ксиамен Виктори Технолоџи“ продава мотори Лимбах Л550, клучна компонента на камикази дронот Шахед-136, кој Русија го користи за напади врз украинските градови.
На веб-страницата на таа компанија, заедно со слоганот „Иновации во решенија за авионски мотори“, има и слика од дронот Шахед.
Бизнис и покрај санкциите
Некое време, кинеските извозници намерно погрешно ги означуваа пратките за да ги заобиколат санкциите на САД и Европа, но според високи претставници на американското Министерство за финансии и аналитичари за оружје, во многу случаи тие веќе дури и не се трудат да го сторат тоа.
Поранешни претставници на американското Министерство за финансии велат дека Кина долго време служи како транзитен центар за компоненти произведени во САД и Европа кои можат да се пренасочат кон погони за производство на дронови во Иран и Русија.
Тие додаваат дека ваквите делови сè повеќе се произведуваат во самата Кина, честопати во помали фабрики кои не се обесхрабрени од западните санкции.
Истрагата на Министерството за финансии на САД откри дека речиси сите американски и европски компоненти биле насочувани преку овластени дистрибутери до трговци во континентална Кина или Хонг Конг, кои потоа ги испраќале во Иран или Русија.
Кина како транзитен центар
Плаќањата обично се вршат преку фиктивни компании кои лесно можат да се основаат во Хонг Конг и помагаат да се прикрие крајната дестинација на стоката.
Во 2024 година, Министерството за финансии на САД воведе санкции врз мрежа на фиктивни компании од Хонг Конг поврзани со Хамед Деган, бизнисмен од Техеран чија компанија беше клучен снабдувач на иранските програми за беспилотни летала и ракети.
Една година подоцна, нова мрежа на компании од Хонг Конг веќе се користеше за прикривање на неговите активности.
„Кинезите ги затворија очите пред овој проток на стоки, иако нивната улога постојано беше разоткривана во јавни извештаи и одлуки за санкции“, рече Миад Малеки, поранешен службеник на Министерството за финансии на САД кој ги надгледуваше програмите за санкции во Канцеларијата за контрола на странски средства (OFAC).
Забележливо зголемување
„Conflict Armament Research“, британска група која истражува нелегална трговија со оружје, соопшти дека забележала „забележително зголемување“ на употребата на компоненти произведени во Кина во беспилотните летала „Шахед“.
Податоците од кинеската царина, исто така, укажуваат дека локалните компании се сè повеќе спремни отворено да тргуваат со компоненти на беспилотни летала и покрај санкциите на САД и Европа.
Според сегашните и поранешните функционери, САД не можат целосно да ја запрат таа трговија, па затоа нивната цел е да ги зголемат трошоците за Иран и Русија колку што е можно повеќе.