Јеменското Министерство за надворешни работи денес објави дека земјата нема да остане неутрална во случај на нови американски потези против Иран, со силна осуда на американските акции во Персискиот Залив и порака за поддршка на Техеран во спорот околу Ормутскиот теснец.
Во соопштението се наведува дека Сана ги смета мерките на САД против иранските бродови и запленувањето на бродови во регионот за „кршење на меѓународното право“ и „пиратство“, со тврдења дека ваквите акции ги дестабилизираат глобалните синџири на снабдување и ги зголемуваат цените на енергијата и храната, објави Иран Прес ТВ.
Јемен изрази поддршка за ограничувањата на Иран за навигација низ Ормутскиот теснец, оценувајќи ги како дел од „правото на самоодбрана“, додека ги обвинува САД за ескалација на тензиите во регионот.
Во соопштението, исто така, се наведува дека Јемен, заедно со Иран, Либан и Палестина, е во тековни регионални конфликти, додека американската администрација е обвинета за „варварство“ и дестабилизација на Блискиот Исток.
Пораката дојде во време на зголемени тензии околу поморските патишта во Персискиот Залив, каде што претходно беа регистрирани инциденти со запленување на бродови и ограничувања на пловидбата, пренесува Танјуг.