Претседателите на Северна Кореја и Белорусија, Ким Џонг Ун и Александар Лукашенко, денес во Пјонгјанг потпишаа договор за пријателство и соработка.
Лукашенко, кој е во Пјонгјанг во дводневна официјална посета, го нарече документот „фундаментален“ и рече дека односите меѓу двете земји „влегуваат во нова фаза“, соопшти неговиот кабинет.
„Да, немавме тесна соработка, главно по наша вина. Но, искрено ми е мило што можам да забележам дека соработката сега значително се интензивираше“, рече Лукашенко.
„Во денешната реалност на глобална трансформација, кога големите сили отворено го игнорираат и кршат меѓународното право, независните земји мора потесно да соработуваат и да ги обединат напорите насочени кон заштита на нивниот суверенитет и подобрување на благосостојбата на нивните граѓани“, додаде тој.
Прес-службата на Лукашенко објави дека Ким изразил „солидарност и целосна поддршка“ на Белорусија и се изјаснил против „нелегалниот притисок на Западот врз Белорусија“.
Белорусија е близок сојузник на Русија.
Лукашенко ѝ дозволи на Русија да ја користи белоруската територија како појдовна точка за инвазија на Украина во февруари 2022 година, а подоцна одобри распоредување на руско тактичко нуклеарно оружје во неговата земја.
Ким, исто така, ја насочи својата надворешна политика кон Русија во последните години, испраќајќи илјадници војници и големи количини оружје за поддршка на војната на претседателот Владимир Путин во Украина, додека ја прикажуваше Северна Кореја како дел од обединет фронт против САД.
Лукашенко и Ким последен пат се сретнаа во септември 2025 година во Пекинг.