Германија ја разгледува можноста да нарача дополнителни американски борбени авиони Ф-35, што би можело да ја продлабочи зависноста на Берлин од американската воена технологија, додека заедничката европска програма за развој на борбени авиони со Франција наидува на сериозни пречки, пишува Ројтерс.
Според извори запознаени со разговорите, Берлин води преговори кои би можеле да резултираат со купување на повеќе од 35 дополнителни авиони, иако конечната одлука се уште не е донесена.
Портпаролот на германската влада негираше дека во моментов има конкретни планови или одлуки донесени за дополнителни набавки.
Германија веќе нарача 35 авиони Ф-35 во 2022 година, кои се очекува да бидат испорачани подоцна оваа година.
Авионите, произведени од американската компанија Локхид Мартин, чинат повеќе од 80 милиони долари по парче и ќе ги заменат старите авиони Торнадо, вклучувајќи ја и нивната улога како дел од системот за нуклеарно одвраќање на НАТО.
Потенцијалната нова набавка доаѓа во време на стагнација во развојот на заедничката германско-француска програма Future Combat Air System (FCAS), вредна околу 100 милијарди евра, која беше лансирана во 2017 година со цел да се развие борбен авион од новата генерација до 2040 година.
Проектот беше забавен поради индустриски спорови меѓу партнерите.
Изворите велат дека Германија и Франција можеби ќе се откажат од развојот на заеднички борбен авион, но ќе ја продолжат соработката во области како што се беспилотните летала и дигиталната инфраструктура за поврзување на воените системи.
Германскиот канцелар Фридрих Мерц ја доведе во прашање долгорочната потреба од борбени авиони со екипаж, наведувајќи ги високите трошоци за развој и промените во воената технологија.
Германскиот министер за одбрана Борис Писториус рече дека судбината на програмата FCAS може да стане појасна во наредните денови.
Американскиот Пентагон испрати прашања за можно купување до германските власти, додека Локхид Мартин изјави дека е фокусиран на спроведување на веќе договорените нарачки.
Проширувањето на германската флота Ф-35 би претставувало значаен стратегиски пресврт кон посилна воена интеграција со Соединетите Американски Држави, но и потенцијално оддалечување од европските напори за поголема одбранбена автономија.