Сириската армија во последните денови направи длабок продор во областите под курдска контрола.
Сега повторно е договорено примирје – тоа предвидува повлекување на единиците на курдската милиција на СДФ.
За што се борбите?
Сириската централна влада на привремениот претседател Ахмед ал-Шара постигна договор за прекин на огнот со курдските милиции по неколкудневни борби.
Курдските медиуми, исто така, објавија за постигнатиот договор.
Специјалниот претставник на САД за Сирија, Том Барак, го поздрави прекинот на огнот.
Тој зборуваше за „одлучувачка пресвртница каде што поранешните противници ја ставаат соработката пред поделбата“.
Спогодбата за прекин на огнот бара борците од курдската милиција на Сириските демократски сили (СДФ) да се повлечат од своите позиции во близина на источен Алепо кон областа источно од реката Еуфрат, соопшти кабинетот на сирискиот претседател.
Дополнително, владата ќе преземе целосна воена и административна контрола врз досега курдските провинции Деир ел-Зор и Рака.
Исто така, контролата врз сите гранични премини, како и гасните и нафтените полиња во регионот, треба да ѝ бидат предадени на сириската влада.
Единиците на СДФ треба да бидат вклучени во Министерството за одбрана и Министерството за внатрешни работи.
Армијата продолжи со напредувањето во курдските области
Пред тоа, конфликтот меѓу Дамаск и СДФ сè повеќе ескалираше.
Во последните денови, владините сили ставија под своја контрола стратешки важни области на север и исток од Сирија, вклучувајќи две важни нафтени полиња и брана, јавуваат државните медиуми и активисти.
За време на повлекувањето на СДФ од неколку области, имаше и вооружени конфликти.
Сириската армија соопшти дека ја презела контролата врз северниот град Табка, како и врз важна брана на Еуфрат – најголемата брана во земјата, клучна за снабдување со вода и електрична енергија.
Конфликт околу автономија и суровини
Позадината на најновите борби во Сирија е првенствено спор околу тоа колку автономија Курдите можат да задржат на самоуправниот североисток и до кој степен властите во Дамаск можат да спроведат централна власт и во тој дел од земјата.
Станува збор и за пристап до ресурси и стратешки важни области, како и за прашањето до кој степен борците на СДФ ќе бидат интегрирани во државната армија.
Уште во март 2025 година, преодната влада и СДФ се согласија за соработка. Сепак, дури и потоа, имаше неколку вооружени конфликти поради несогласувања околу специфичните услови за спроведување на договорот.
Ал Шара требаше да биде во Берлин денес
Привремениот сириски претседател Ахмед ал-Шара ја одложи планираната посета на Германија во последен момент.
Ова го потврди портпаролот на владата во недела навечер. Посетата беше закажана за понеделник и вторник. Актуелната безбедносна ситуација и борбите во Сирија беа наведени како причина.
Германскиот канцелар Фридрих Мерц испрати покана за посета на Германија уште во ноември.
За време на престојот во Германија, Ал-Шара требаше да се сретне со претседателот Франк-Валтер Штајнмаер, канцеларот Мерц, како и со неколку федерални министри и претставници на економијата.
Главните теми на дискусија требаше да бидат враќањето на сириските бегалци во нивната татковина и обновата на таа арапска земја.
Критиките за планираната посета дојдоа, меѓу другото, од курдските и алавитските заедници во Германија, кои ја обвинуваат сириската влада за насилно потиснување на етничките и религиозните малцинства.
Сепак, во официјалната програма на Светскиот економски форум (WEF) во Давос за четврток (22.01.) попладне, сè уште е закажана сесија наречена „Разговор со Ахмад ал-Шара, претседателот на Сирија“.