„Инфраструктурата e основа на квалитетниот урбан живот. Во изминатите години вложувавме во континуитет во овој многу значаен сегмент за граѓаните,“ изјави Аце Трајковски, кандидат за советник на Движењето ЗНАМ – За наша Македонија во Куманово.
Тој истакна дека Општината ќе продолжи да вложува во развој и модернизација на инфраструктурата, со цел да се обезбеди подобро секојдневие за сите граѓани.
„Ќе реализираме повеќе значајни проекти за изградба и одржување на патната инфраструктура, на гасификацијата, модернизација и проширување на системите за водоснабдување, фекалната и атмосферската канализација и други суштински проекти за подобрување на животот во секој дом,“ нагласи Трајковски.
Меѓу планираните активности се реконструкции на главните сообраќајници во централното градско подрачје, подобрување на уличното осветлување, изградба на тротоари и нови паркинг зони во приградските населби, како и уредување на патната инфраструктура во руралните средини. Предвидена е и изградба на нов мост на Крива Река во село Довезенце.
„Куманово денес е пример за општина што расте рамномерно и плански. Инфраструктурниот развој е насочен кон секое маало, секое село и секоја улица бидејќи сите заслужуваат подобри услови. Градиме нови улици, обновуваме тротоари, поставуваме улично осветлување и водоводни и канализациски мрежи, таму каде што тоа најмногу им треба на граѓаните,“ изјави Трајковски.
Тој додаде дека со ваквите проекти се покажува дека Куманово е општина што не заборава никого.
„Секој метар нов асфалт, секоја осветлена улица, секоја нова инфраструктура и реконструирана патека е доказ дека работиме заедно и вложуваме во иднината на нашата заедница,“ порача Трајковски.
Никола Ивановски