Рано утрово, украинските власти објавија нови бомбардирања и покрај едностраното примирје објавено од рускиот претседател Владимир Путин, кое наводно стапи на сила на полноќ.
Руските авиони постојано фрлаа наведувани бомби над северниот Сумски регион, соопштија украинските воздухопловни сили на Телеграм, предупредувајќи за континуирана воздушна активност во источен правец.
Во меѓувреме, рано утрово беа пријавени напади со беспилотни летала и предупредувања во регионот Липецк во западна Русија, според регионалниот гувернер Игор Артамонов.
Информациите дадени од двете страни не можеа независно да се потврдат.
Едностраното 72-часовно примирје прогласено од Москва стапи на сила веднаш по полноќ, според руската државна новинска агенција ТАСС.
Путин го објави прекинот на огнот за време на годишната прослава на Денот на победата во Русија на 9 мај, со кој се означува крајот на Втората светска војна во Европа.
Украина го отфрли потегот како симболичен и, заедно со САД, продолжува да повикува на прекин на огнот во траење од најмалку 30 дена.
„Нашиот предлог за запирање на нападите, за прекин на огнот од најмалку 30 дена, сè уште важи“, рече украинскиот претседател Володимир Зеленски во видео обраќање до нацијата синоќа, пренесува Хина.
„Но, светот гледа дека Русија не дава никаков одговор – никаков одговор освен нови напади“, додаде тој.
Украина се брани од целосна руска инвазија повеќе од три години.