Комесарката за проширување на Европската унија (ЕУ) Марта Кос изјави дека прекуграничната соработка е инкубатор за проширувањето на ЕУ, додавајќи дека нејзиниот сон е целиот Западен Балкан да се интегрира во ЕУ, а да исчезнат границите и билатералните спорови, пренесува Anadolu Agency.
„Мојот сон е целиот Западен Балкан да биде интегриран во ЕУ и да исчезнат границите и билатералните конфликти исто како што исчезнаа во многу други делови од нашиот континент, а особено овде на италијанско-словенечката граница. Ова го гледам како дел од мојата мисија“, рече Кос на „Intereg GO!“ конференција која се одржува во Горица, Италија и Нова Горица, Словенија.
Таа рече дека е фрустрирачки да се види дека толку голем потенцијал останува нереализиран во Западен Балкан поради билатералните тензии и нерешените спорови.
Таа укажа на важноста на програмата Интерег за регионот на Дунав, која предвидува повеќе од 130 проекти за соработка на тој историски простор.
„Задоволство од програмата за соработка Кос го изрази своето задоволство што од јули минатата година, програмата за соработка Intereg Europe е отворена за Србија, Албанија, Босна и Херцеговина, Молдавија, Црна Гора, Северна Македонија и Украина. Овие земји сега имаат целосен пристап до 394 милиони евра финансирање за прекугранични политики, и тоа е прекрасно“, рече Кос.
Како пример, таа ги наведе плановите на ЕУ за воспоставување зелени ленти на границите во Западен Балкан, што според неа ќе помогне да се намали времето на чекање на границите за 50 до 70 проценти.
Комесарот Кос рече дека европскиот проект, регионалната соработка и негувањето на довербата меѓу заедниците се рецепт за помирување.
„Сега, повеќе од кога било, мораме да инсистираме на тоа, бидејќи за прв пат по повеќе од една деценија, имаме реални шанси да внесеме една или повеќе земји во ЕУ во процесот на проширување“, заклучи Кос.