Најмалку пет лица загинаа во шумските пожари околу Лос Анџелес, соопштија вчера градските власти.
Пожарот се шири и во населбата Холивуд, каде што се евакуираат жителите, пренесува АФП.
Уништени се околу 1.500 згради, а повеќе од 100.000 жители на Лос Анџелес мораа да ги напуштат своите домови.
Властите стравуваат дека бројот на загинати може да биде поголем.
На брзото ширење на пожарот влијае силен ветер кој достигнува брзина и до 160 километри на час, пренесува Бета.
Пожарникарите се борат со огнот во тешки услови, објави Си-Ен-Ен.
Директорот за управување со вонредни состојби во округот Лос Анџелес, Кевин Мекгован, рече дека градот се соочува со „историска природна катастрофа“.
Новоизбраниот американски претседател Доналд Трамп уште еднаш го обвини гувернерот на Калифорнија Гевин Њусом за ширење на шумските пожари во државата и го повика да поднесе оставка.
„Еден од најдобрите и најубавите делови на САД гори до темел. (Јужна Калифорнија) се претвора во пепел, а Гевин Њусом треба да поднесе оставка“, напиша Трамп на својата платформа на социјалните мрежи „Truth Social“.
Тој додаде дека гувернерот на Калифорнија е „виновен за се“.
Трамп го обвини Њусом што не потпишал наредба за полнење на резервоари за складирање вода, што според него ќе му помогне на Лос Анџелес да одговори на пожарите што ја зафатија областа.
Градот е зафатен од пламен од двете страни на Палисадите на Пацификот, рид со поглед на Пасадена, додека нов пожар избувна во Холивуд Хилс, во Студио Сити, во средата навечер по локално време.
Противпожарната служба во Лос Анџелес издаде наредба за евакуација на луѓето од дел од булеварот Холивуд на југ, а во таа област е и театарот Долби, каде традиционално се одржува церемонијата на Оскарите, која овојпат ќе биде одложена.
Пожарот во подножјето на планината Сан Габриел на исток е надвор од контрола.
Со оглед на тоа дека брзината на ветрот е намалена, хеликоптерите повторно беа во воздухот во моментот на пишување, додека екипите се обидуваа да го изгаснат или барем да го задржат пожарот и да ги заштитат имотите.
Три лица се уапсени за грабеж во моментот на пожарот, соопштија полициски претставници, пренесува Ројтерс.
И жителите на Холивуд Хилс беа евакуирани и ја опишаа ситуацијата како хаотична.
Поради густиот сообраќај и присуството на противпожарни екипи, многумина имаа проблем да ја напуштат областа, пренесува Танјуг.
Најлошото беше во една од најбогатите населби во САД, Пацифик Палисадес.
Актерот Били Кристал и неговата сопруга Џенис за споменатиот медиум изјавиле дека ја изгубиле куќата во таа населба.
„Зборовите не можат да го опишат обемот на уништувањето. Чувствуваме тага за пријателите и соседите кои исто така ги загубија своите домови и бизниси во оваа трагедија. Џенис и јас живееме во таа куќа од 1979 година. Таму ги одгледавме нашите деца и внуци. Секој дел од нашата куќа беше исполнет со љубов“, рече тој.
Во пожарот домот го загуби и американската актерка и пејачка Парис Хилтон.
Нејзиниот претставник потврди дека нејзината куќа е уништена.
Актерката Џејми Ли Кертис рече дека нејзиниот дом е безбеден, но дека целата населба ја нема.
„Толку многу луѓе изгубија сè. Помогнете каде што можете. Благодарам на спасувачките екипи и пожарникарите“, напиша Кертис на Инстаграм.
Синот на актерската двојка Том Хенкс и Рита Вилсон, Чет Хенкс, на Инстаграм напиша дека населбата во која пораснал гори до темел.
Актерката Менди Мур се соочува со пожар во Итон. Нејзиниот дом се наоѓа во населбата Алтадина, а актерката им се заблагодарила на пријателите кои на нејзиното семејство му обезбедиле сместување за време на евакуацијата.