Администрацијата на американскиот претседател Џозеф Бајден побара од Европската унија автоматски да ги усогласи нејзините стандарди за емисии на метан за увоз на течен природен гас (ЛНГ) со американските регулативи за да се обезбеди непречен увоз од САД, се вели во писмото што го видел Ројтерс.
Агенцијата вели дека поврзувањето на американските и европските стандарди за метан ќе ја заштити нивната растечка трговија со течен природен гас.
„Разбираме дека за овој процес ќе биде потребно време. Сепак, сакаме да започнеме дискусии што е можно поскоро и да обезбедиме континуирано, доверливо и стабилно снабдување со природен гас од Соединетите Американски Држави во Европа“, напишаа американските власти во писмото од 28 октомври, само неколку дена пред Доналд Трамп да победи на изборите во САД.
Во мај, земјите од Европската унија одобрија закон со кој се наметнуваат ограничувања на емисиите на метан при увоз на нафта и гас во Европа почнувајќи од 2030 година, што врши притисок врз меѓународните добавувачи постепено да се усогласат со новите стандарди, пренесува Танјуг.
Администрацијата на Бајден донесе свои правила за емисиите на метан кон крајот на минатата година, но постои можност Доналд Трамп да ги смени или суспендира за да ги намали трошоците за американската енергетска индустрија.
Метанот, главната компонента на течниот природен гас, значително придонесува за штетниот ефект на стаклена градина врз климата, а повеќе од 150 земји во светот ветија дека ќе ги намалат своите емисии на метан за 30 проценти во оваа деценија како дел од борбата против климатските промени. .