Пекинг ќе работи заедно со Москва за да се бори за правда на меѓународната сцена и да го олесни формирањето на мултиполарен светски поредок, изјави денеска кинескиот министер за надворешни работи Ванг Ји.
„Кина и Русија ќе продолжат да се борат за меѓународна правда и ќе придонесуваат за изградбата на мултиполарен свет. Кина и Русија го предводат патот во олицетворение на концептот на заедница со заедничка судбина и дејствуваат како сила која се спротивставува на хегемонијата, како и унилатерални политики засновани на сила“, истакна тој во написот за People’s Daily, посветен на 75-годишнината од билатералните односи.
Според неговите зборови, следењето на историскиот тренд на мултиполарниот светски поредок „треба да се гледа како стратешки избор на две земји“.
Тој истакна дека Кина и Русија взаемно го поддржуваат претседавањето со Шангајската организација за соработка и БРИКС, правејќи заеднички напори за проширување на двете организации.
„Кина и Русија ќе продолжат активно да го водат трендот на независност и заемно корисна соработка“, рече високиот дипломат, пренесува Танјуг.
Тој истакна дека двете нации ќе ја прослават 80-годишнината од победата над нацизмот и во војната за отпор на кинескиот народ против јапонската агресија.
„Ние цврсто ќе ги промовираме победничките достигнувања од Втората светска војна и ќе работиме заедно за да го олесниме формирањето на вистински поглед на нејзината историја“, заклучи Ванг.