Кит белуга кој стана познат во Норвешка под сомнение дека е „руски шпион“ е застрелан, соопштија организациите за заштита на животните.
Организациите NOAH и OneWhale објавија дека поднеле пријава до норвешката полиција, барајќи од нив да покренат истрага за смртта на животното.
Белугата, наречена Хвалдимир, се прослави во 2019 година, откако беше видена во морето како носи специјално опремена ремен со држачи за камера, што предизвика загриженост дека животното можеби било обучено од руската војска да собира разузнавачки информации.
Китот бил пронајден мртов во саботата во заливот на југозападниот брег на земјата.
Во понеделникот, неговото тело беше пренесено во локалната филијала на Норвешкиот ветеринарен институт за обдукција.
Извештајот за смртта на Хвалдимир се очекува „во рок од три недели“, изјави портпаролката на Институтот.
Покренување истрага
NOAH и OneWhale повикаа на истрага „заснована на убедливи докази дека китот им подлегнал на прострелните рани“.
Во објава на Инстаграм во средата, OneWhale рече дека „неколку ветеринари, биолози и балистички експерти ги разгледале [доказите] за раните на Хвалдимир“, утврдувајќи дека тие се криминални.
„Раните на китот се алармантни и од таква природа што не може да се исклучи кривично дело – тоа е шокантно“, рече директорот на NOAH, Сири Мартинсен во изјавата.
„Со оглед на сомнежот за кривично дело, од клучно значење е брзото вклучување на полицијата“, рече таа.
Полицијата потврди дека добила дојава за смртта на Хвалдимир и соопшти дека ќе испита дали има основа за истрага.
Стратешка локација
Норвешкиот ветеринарен институт за новинската агенција АФП изјави дека „полицијата ќе биде известена доколку се појави нешто сомнително“ за време на обдукцијата.
Со проценета возраст од 15 до 20 години, Хвалдимир бил релативно млад за кит белуга кој обично живее од 30 до 35 години, според Светскиот фонд за природата (WWF).
Сомнежот дека Хвалдимир е „шпионски кит“ се разгоре во 2019 година кога беше забележан на стратешка локација во Баренцовото Море, жариште на ривалството Исток-Запад за време на Студената војна.
Најмоќната московска поморска флота се наоѓа во Баренцовото Море, а Русија и Западот продолжуваат да го следат движењето на нивните подморници во регионот.