Се ближи денот кога Спортската сала во Куманово ќе блесне во својот полн сјај, а реконструкцијата е во завршна фаза.
Како што објави градоначалникот на Општина Куманово Максим Димитриевски, во тек се подготовки за поставување на новиот под.
– Нашата убавица, Спортска сала – Куманово добива нов лик. По завршениот втор слој на епоксид се подготвува поставување на подот на борилиштето, вели Димитриевски.
Претходно беше поставено новото осветлување, но и новиот модерен висечки ЛЕД семафор кој ќе се наоѓа на центарот на конструкцијата.
Како што претходно најави кумановскиот градоначалник, ќе следува и замена на санитариите, одводот, водоводот, лепење плочки и партерно уредување од надвор.
– Проблемите што ги имавме со кровната конструкција веќе се решени и се работи на осветлување и комплетна замена на електриката во спортската сала, рече Димитриевски.
Првиот спортски натпревар неофицијално ќе се игра за денот на ослободување на Куманово – 11 Ноември.
Според техничката документација целиот проект требало да чини 6,5 милиони евра, но работите се завршени за многу помалку пари, појаси Димитриевски претходно.
– Согласно проектната документација целата реконструкција според проектот направен пред четири години изнесува 6,5 милиони евра. Се надевам дека освен позицијата греење и ладење ние успеавме со квалитетен избор на изведувачи по пат на јавни набавки нема да потрошиме ниту 2 милиони евра и потоа ќе бараме само да биде решено греењето и ладењето, појасни Димитриевски.
Спортската сала во Куманово е изградена 1980 година и има капацитет од околу четири илјади седишта.
Никола Ивановски