Рускиот министер за надворешни работи Сергеј Лавров го обвини Западот за ќор-сокакот околу иднината на Црноморскиот договор за жито, велејќи дека „Москва практично не видела резултати од договорот за извоз на жито и ѓубрива“.
Русија сигнализираше дека доколку не се исполни списокот на барања за отстранување на бариерите за нејзиниот извоз, таа нема да се согласи да го продолжи поврзаниот договор по 18 мај кој овозможува безбеден извоз на жито за време на војната од пристаништата на Украина во Црното Море.
Едно од барањата на Русија е Руската земјоделска банка (Росселхозбанк) да се врати во банкарскиот систем SWIFT.
Лавров рече дека нема планови тоа да се случи и како алтернатива, Антонио Гутереш, шефот на Обединетите нации, предложи американските банки да ѝ помогнат на руската банка во трансакциите.
Лавров потврди дека една банка „љубезно се согласила да финансира една операција“, но дека тоа не е долгорочно решение.
Извор запознаен со трансакцијата рече дека американскиот Стејт департмент и Министерството за финансии на САД побарале од JPMorgan Chase & Co да спроведе „многу ограничена и високо контролирана“ трансакција поврзана со извозот на земјоделски материјали, што се случи овој месец.
Изворот рекол дека може да има дополнителни трансакции, пренесува Ројтерс.
На прес-конференција во Обединетите нации, на која беа опфатени повеќе теми, тој рече дека во догледно време ќе има реакција на писмото што Гутереш го испрати до рускиот претседател Владимир Путин за договорот за жито.
Договорот на ОН помогна да се убеди Русија да дозволи извоз на украински жито од Црното Море според договорот, исто така посредуван од ОН и Турција во јули минатата година, чија цел е да се реши глобалната криза со храната, за која претставниците на ОН велат дека била влошена со инвазијата.
„Никому не му треба Трета светска војна, но се чини дека некој е подготвен да оди до самиот крај“, рече Лавров, пренесе Ројтерс.
Запрашан за новинарот на Вол Стрит Журнал, Еван Гершович и поранешниот маринец Пол Вилан, кои се држат во заробеништво во Русија и дали би можело да се случи размена на затвореници, Лавров рече дека постои посебен, нејавен канал за да се разговара за размена на затвореници со САД.
Сите информации поврзани со најновите случувања со војната во Украина можете да ги прочитате ТУКА.