Републикански пратеници вчера го критикуваа претседателот Џо Бајден дека чекал неколку дена да нареди соборување на кинески балон, обвинувајќи го дека покажал слабост кон Кина и првично се обидува да го прикрие нарушувањето на американскиот воздушен простор.
Американски воен авион собори балон во близина на брегот на Јужна Каролина во саботата, една недела откако првпат навлезе во воздушниот простор на САД во близина на Алјаска.
„Бајден не сакаше да ја провоцира Кина“
Американскиот секретар за одбрана Лојд Остин во саботата изјави дека американската војска собрала вредни разузнавачки информации проучувајќи го балонот и дека уште три кинески балони за надзор поминале над територијата на САД за време на администрацијата на Трамп, што тој го негираше.
„Требаше да го урнеме балонот над Алеутските острови. Не требаше да го пуштиме да помине низ целиот континентален САД“, рече републиканецот Том Котон, член на Комитетот за вооружени служби на Сенатот, мислејќи на островите крај Алјаска.
Котон изјави за „Фокс њуз Сандеј“ дека верува дека Бајден чекал да ја објави веста за балонот за да ја спаси планираната посета на државниот секретар Антони Блинкен на Пекинг, која на крајот беше одложена. Тој смета дека Бајден не сакал да ја провоцира Кина.
„Критиките на републиканците се предвремени“
Бајден во саботата рече дека наредил соборување на балонот кога преминал во Монтана во средата, но Пентагон му препорачал да почека додека не биде над отворено море за да ги заштити цивилите.
Американскиот секретар за транспорт Пит Бутиџиг го бранеше Бајден, велејќи дека сака да ги заштити американските граѓани. Водачот на мнозинството во Сенатот, демократот Чак Шумер, рече дека критиките на републиканците се прерани и политички мотивирани.
Тој рече дека Пентагон ќе ги информира сенаторите за балонот и кинескиот надзор на 15 февруари.