Меѓу документите кои ФБИ ги пронашла при претресот на имотот на поранешниот американски претседател Доналд Трамп на Флорида се нашол и документ во кој се опишани одбранбените способности на владата, вклучувајќи ги и нејзините нуклеарни капацитети, објави Вашингтон пост.
„Документ кој ги опишува воените сили на странска земја, вклучувајќи ги и нејзините нуклеарни капацитети“, е пронајден меѓу бројните доверливи документи што федералната полиција ги пронашла во истрагата спроведена во домот на поранешниот американски претседател, пишува The Washington Post.
Весникот во извештајот цитира луѓе запознаени со истрагата, но не наведува на која влада се однесува документот или дали е непријател или пријател на САД.
Според Ројтерс, адвокатите на Трамп и Министерството за правда не можеа да ги коментираат наводите.
Одземени се повеќе од 11.000 документи
Според судските записи, ФБИ заплени повеќе од 11.000 документи и фотографии во претресот на имотот на Трамп во Мар-а-Лаго на 8 август.
Меѓу нив има 18 документи класифицирани како „строго доверливи“, повеќе од 50 како „тајни“ и 31 како „доверливи“.
„Вашингтон пост“ наведува дека некои од нив содржат информации за операции на САД класифицирани како „строго доверливи“, до кои не можат да пристапат ниту лица овластени за пристап до такви информации, но за кои мора да имаат посебно овластување.
Пристапот до некои од тие документи е толку ограничен што дури и највисоките функционери за национална безбедност од администрацијата на Бајден не се овластени да ги разгледуваат.
Американското Министерство за правда покрена истрага против Трамп бидејќи тој зел некои документи додека ја напуштал Белата куќа во јануари 2021 година и ги однел во Мар-а-Лаго.
Во понеделникот, федералниот судија го одобри барањето на Трамп да назначи независен експерт за преглед на документите запленети како дел од истрагата на ФБИ, што би можело да ја продолжи истрагата.