Жените ширум светот масовно протестираа во средата на Меѓународниот ден на жената за да ги одбранат своите права, кои се загрозени во се повеќе земји.
Планирани се многу организирани протести во големите градови како Мадрид, каде вообичаено се одржува голем настан на 8 март.
Мотивите за демонстрациите се многубројни: од талибанското прогонство на правото на жените на образование, работа и учество во јавниот живот, преку масовното антирежимско движење во Иран предизвикано од смртта на една млада жена бидејќи таа не се покривала, до загрозувањето на правото на абортус во САД и последиците од војната во Украина врз жените.
„Жените се првите жртви на војната и се недоволно застапени во дипломатските преговори“, изјавија лидерите пред Советот за безбедност на ОН во вторникот.
„Родовата еднаквост е сè уште подалеку. Со сегашното темпо, таа ќе се постигне за 300 години, проценува UN Women“, рече генералниот секретар на ОН Антонио Гутереш во понеделникот во Њујорк во говорот пред дискусијата организирана од Комисијата за статусот на жени (ЦСР).
Гутереш го искористи Авганистан како пример, каде што „жените и девојките се отстранети од јавниот живот“.
Универзитетите во земјата беа отворени во понеделникот по долгиот зимски распуст, но само на мажите им беше дозволено да ги поминат праговите, бидејќи на жените им е забрането да одат на универзитети откако Талибанците се вратија на власт во 2021 година.
Забранети собири
Во симболичен и сосема нов потег во пресрет на 8 март, Европската унија воведе санкции против талибанската министерка за високо образование, Неда Мохамад Надим, која е „одговорна за општото кршење на правото на образование на жените“.
Со санкции, ЕУ казни и други поединци или субјекти одговорни за кршење на правата на жените во Иран, Русија, Јужен Судан, Мјанмар или Сирија.
Во Лондон, Музејот на Мадам Тисо го прославува Денот на жената со претставување на нова восочна фигура на суфражетата Емелин Панкхерст, која во 1903 година го основала женското движење кое барало право на глас за жените.
Во Европа планирани се собири во повеќе земји, меѓу кои и Франција, каде со манифестации ќе се бара „еднаквост на жените во работата и животот“ и ќе се одржуваат во околу 150 градови, а акцентот ќе биде ставен на противењето на актуелната пензиска реформа, која тие веруваат дека е неправедно кон жените.
На друго место во светот, протестите се забранети во некои земји, на пример во Лахоре во источен Пакистан.
Властите на таа конзервативна и патријархална земја ја оправдаа одлуката за забрана со „контроверзни транспаренти“, за кои велат дека се пораки за табу теми како развод, сексуална злоупотреба или менструација.
Во Куба, поради неможноста за отворени протести, женските независни организации се мобилизираат на „виртуелна демонстрација“, на социјалните мрежи во кампања за сензибилизирање на јавноста за фемицид.
Во Мексико, под слоганот „Нема повеќе убиени жени“ и „Против насилството на мажите и несигурната работа“, протести се одржуваат во поголемите градови во земјата каде според официјалните податоци во 2022 година имало 969 случаи на фемицид.
Право на абортус
Во Колумбија, собирите бараат мерки против зголемувањето на фемицидите, како што сведочат податоците.
Во 2020 година, 182 биле убиени само затоа што биле жени, а во 2022 година, според официјалните податоци, биле убиени 614 жени.
Американскиот државен секретар Ентони Блинкен и првата дама Џил Бајден ќе доделат награда во Вашингтон за нивниот придонес за „подобра иднина“ на „единаесет извонредни жени од целиот свет“.
Активистите за женски права се мобилизираат за овогодинешниот Ден на жената посебно за да го одбранат правото на абортус, кое во САД е се позагрозено од јунската одлука на Врховниот суд за поништување на одлуката „Ро против Вејд“, која во 1973 година уставно го гарантираше тоа право.
Во Европа правото на абортус е загрозено во Унгарија и Полска, кои имаат најригидни закони за абортус.
„Ние се бориме против патријархатот, кој постојано се бори против нашите права, како што е правото на абортус, кое го постигнавме и со борба“, се вели во манифестот објавен во пресрет на маршот во Мадрид, закажан за 20 часот.