Претседателот на Соединетите Американски Држави, Доналд Трамп изјави дека може да има договор меѓу САД и Иран.
„Цените на нафтата паѓаат со вртоглава брзина – се намалуваат за речиси 10 долари за барел, што е рекорд – затоа што луѓето веруваат дека нема да има војна со Иран. Иран сака договор, и тоа што е можно поскоро. Тоа може да се случи“, напиша Трамп во објавата на социјалната мрежа „Вистина“.
Американскиот претседател претходно во понеделникот негираше дека САД ќе го нападнат Иран.
Тој кратко одговорил негативно на новинарско прашање дали се размислува за ваков потег, пренесува NBC News.
Тој додаде дека светот би бил „поинакво место“ доколку на Иран му се дозволи да поседува нуклеарно оружје.
Трамп изјави и дека Иран има „највисока стапка на инфлација во последните 15 години, во споредба со која било друга земја“, што, според него, значи дека тие „сакаат да постигнат договор“.
Меѓутоа, Соединетите Американски Држави извршија ограничени одбранбени напади во текот на ноќта против ирански цели во Ормутскиот теснец, вклучително и островот Кешм, односно позиции од кои, според американскиот официјален претставник, биле истрелани проектили земја-воздух кон американските сили и средства.