Американскиот претседател Доналд Трамп синоќа им изјави на новинарите дека британскиот премиер Кир Стармер е многу задоволен од начинот на кој Велика Британија се третира во однос на царините.
„Имаме многу добар дијалог и мислам дека тој беше многу задоволен од тоа како ги третиравме за тарифите“, им рече Трамп на новинарите на бродот „Ер Форс 1“, мислејќи на увозниот данок од 10 отсто што го воведе на Обединетото Кралство, еден од најниските во светот.
Стармер вчера изјави дека неговата влада дејствува мирно и во национален интерес.
Сепак, додава Би-Би-Си, британската влада објави листа на американски производи кои би можеле да бидат погодени со контрамерки, што се толкува како сигнал дека зазема поостар став и дека ќе одговори.
Визијата на Стармер за нов економски поредок
Премиерот на Обединетото Кралство, Кир Стармер, вчера изјави дека светот, како и на полето на одбраната и безбедноста, влегува во нова ера кога се во прашање економијата и трговијата.
Тој рече дека неговата влада сè уште сака да постигне трговски договор со САД, но повтори дека ништо не е надвор од масата кога станува збор за одговорот на Велика Британија на американските царини.
„Сакам да бидам апсолутно јасен, ние сме подготвени. Всушност, една од големите предности на оваа земја е нашата способност да се задржиме со ладна глава“, рече Стармер.
Велика Британија работи со недели на трговски договор со САД за да се избегне целосното влијание на царините наметнати на земји како Канада и Кина.
На прашањето на програмата на Би-Би-Си Тудеј дали е вистина дека Велика Британија постигнала договор со американски официјални лица и дека чека само одобрение од претседателот, министерот за економија Џонатан Рејнолдс одговори: „Тоа не е неточен опис“.