Соединетите Американски Држави се подготвени да го пополнат дипломатскиот капацитет на својата амбасада во Москва за да можат да издаваат визи за руските граѓани, пренесе ТАСС, повикувајќи се на американски извор.
Неименуваниот извор објасни дека американската амбасада во Москва ќе биде екипирана на ниво што ќе овозможи обезбедување соодветни услуги, вклучително и издавање визи.
На таа тема ќе се разговара за време на вториот круг руско-американски консултации што ќе се одржи денеска во Истанбул.
Руската делегација ќе ја предводи амбасадорот на Русија во САД, Александар Дарчиев, додека американската делегација ќе ја претставува Соната Култер, заменик помошник државен секретар за Европа и Евроазија.
На средбата ќе се разговара и за работата на дипломатските претставништва на двете земји.