Синдикатите во Германија за понеделник најавија генерален штрајк во транспортот и повикаа 350.000 вработени да престанат со работа 24 часа, а на тој ден почнува и третата рунда преговори меѓу работодавачите и вработените во јавниот сектор.
Со невиден предупредувачки штрајк, синдикатот на железницата и транспортот ЕВГ и синдикатот на вработените во јавниот сектор ver.di сакаат да парализираат голем дел од сообраќајот низ Германија во понеделник – вклучувајќи железнички и воздушни, како и дел од воден и копнен сообраќај, пишува ДВ.
24-часовниот штрајк започнува на полноќ во недела на 26 март и ќе трае до полноќ во понеделник на 27 март, соопштија двата синдикати.
Вер.ди повика 120.000 вработени на штрајк, а ЕВГ 230.000 вработени во автобуските компании и железницата.
Имајќи го предвид расположението на вработените во транспортните компании, се очекува високо ниво на учество, изјави првиот човек на синдикатот ver.di Франк Вернеке најавувајќи го штрајкот и додаде дека „ефектот ќе биде огромен“.
Штрајкот ги зафаќа сите видови железнички сообраќај низ државата. Дојче бан (ДБ) воопшто нема да работи.
Претседателот на ЕВГ, Мартин Буркерт, препорача патниците да пристигнат на нивната дестинација што е можно порано во недела „бидејќи дефинитивно може да има смени што ќе траат од недела навечер до понеделник“.
Ќе штрајкува и претпријатието за автопатишта, како и Управата за водовод и транспорт, што значи дека одредени патни тунели исто така ќе бидат погодени од штрајкот.
Ver.di исто така повикува на затворање – на аеродромите и на локалниот јавен превоз – во покраините Хесен, Северна Рајна-Вестфалија, Баден-Виртемберг, Саксонија, Долна Саксонија, Рајна-Пфалц и Баварија.
Тоа значи дека се погодени сите комерцијални аеродроми, освен во Берлин.
Нема да има патнички сообраќај на најголемиот германски аеродром во Франкфурт, како и во Минхен.
Раководството на Франкфуртскиот аеродром Фрапорт во четвртокот соопшти дека итно се бара патниците да не доаѓаат на аеродромот во понеделник. Нема да има ниту транзитен сообраќај.
Што бараат синдикатите?
Според аеродромското здружение АДВ, штрајкот ќе погоди стотици илјади патници.
„Околу 380.000 деловни и приватни патници нема да можат да летаат“, соопштија од здружението.
„Синдикатите во Германија се збогуваат со традицијата на постигнување решенија на преговарачка маса“, рече извршниот директор на АДВ, Ралф Бејсел.
Според неговото мислење, најавените дејствија излегуваат од секаква замислива и оправдана мерка и немаат никаква врска со предупредувачкиот штрајк.
„Тоа е обид да се воведат француски услови во Германија со генерален штрајк“, рече Бисел.
Со овие акции синдикатот ver.di го зголемува притисокот врз третата рунда преговори со федералната влада и локалните власти, која започнува во понеделник.
Заедно со Здружението на државни службеници, Синдикатот на јавниот сектор бара 10,5 отсто и најмалку 500 евра повеќе месечно за 2,5 милиони вработени.
На крајот на февруари, во втората рунда преговори, работодавачите (државата) понудија зголемување на платите за пет отсто во два чекора и еднократна исплата во вкупен износ од 2.500 евра.
Синдикатите се „соочени со целосно несоодветна понуда, и затоа е важно пред почетокот на третиот круг на колективно договарање, повторно да ставиме до знаење дека нашите барања имаат широка поддршка кај вработените“, рече Вернеке.
Сите информации за економско-енергетската криза во Македонија, регионот и светот можете да ги прочитате ТУКА.