Мехмет Оз, познат лекар и поранешен ТВ водител, е потврден во американскиот Сенат за нов шеф на агенцијата која ја надгледува здравствената заштита на милиони Американци, јавува Би-Би-Си.
Оз, кој никогаш немал јавна функција, минатата година беше избран за оваа позиција од страна на актуелниот американски претседател Доналд Трамп, назначувајќи го за директор на Центрите за Медикер и Медикејд услуги (CMS).
„Ќе ја направиме Америка повторно здрава“
Вчера неговата номинација беше потврдена во американскиот Сенат, кој е под контрола на републиканците, со 53 гласа за и 45 против, по партиска линија.
Оз, кој има 64 години, првично обучен како хирург, се прослави во раните 2000-ти во шоуто на Опра Винфри.
Неговите пристапи кон здравјето постојано беа под лупа на јавноста.
Тој претходно беше критикуван од здравствените работници за промовирање на, како што велат, лошите совети за лековите за слабеење и „чудесните лекови“, како и тврдењата на почетокот на пандемијата дека лековите за маларија може да се користат за лекување на „Ковид-19“.
Откако го назначи Оз на чело на CMS, Трамп рече дека можеби нема лекар поквалификуван и способен да ја направи Америка повторно здрава.
Оз тесно ќе соработува со Кенеди
Пред инаугурацијата, тимот на Трамп објави дека Оз тесно ќе соработува со американскиот министер за здравство Роберт Кенеди Јуниор со цел „да се спротивстави на комплексот на индустриски болести“.
CMS управува со најголемите програми за здравствена заштита во САД и обезбедува здравствена покриеност за приближно половина од Американците.
Тој, исто така, го регулира здравственото осигурување и утврдува политики кои ги одредуваат цените што ги добиваат лекарите, болниците и фармацевтските компании за дадените медицински услуги.
Според податоците од Канцеларијата за буџет на Конгресот, американската влада потрошила повеќе од 1,4 трилиони долари за Medicare и Medicaid во 2023 година.
Оз ја водеше емисијата The Dr. Oz Show во која на гледачите им даваше лекарски совети.
Демократите го сомничат за затајување данок
Но, тој беше критикуван затоа што препорачува хомеопатија, алтернативна медицина и други методи кои критичарите ги опишаа како псевдонаука.
Демократите претходно тврдеа дека прегледот на неговите финансиски извештаи сугерирал дека Оз можеби не платил 403.739 долари даноци на Медикер за повеќе од 10 милиони американски долари приход од неговата медиумска компанија помеѓу 2021 и 2023 година.