Претставничкиот дом на американскиот Конгрес го одобри нацрт-законот за помош на Украина и нови санкции против Русија, пишува АП.
Документот го поддржаа 226 конгресмени, 195 беа против.
Меѓу оние кои гласаа за беа 207 демократи, 18 републиканци и еден независен конгресмен.
За законот да стапи на сила, документот мора да биде одобрен од Сенатот на САД.
Предлог-законот, кој беше доставен до Конгресот во април, го овластува американскиот претседател да ја процени ситуацијата во руско-украинските односи и врз основа на оваа анализа да преземе рестриктивни мерки.
Станува збор за воведување санкции против финансиски институции, нафтени и рударски компании во Русија, рестрикции на средства и визи за руските службеници, како и зголемување на царините за сите руски стоки и услуги увезени во САД до 500 отсто од нивната вредност.
Нацрт-законот, исто така, има за цел да ја зајакне американската помош за Украина преку обезбедување на повеќе од 1 милијарда долари за безбедност и реконструкција.
Дополнително, документот предвидува распределба на уште 8 милијарди долари на Киев за одбрана во форма на заеми.
Покрај тоа, Пентагон ќе има право да обезбедува разузнавачка помош за Украина до крајот на 2027.
Стејт департментот, пак, ќе мора да го зајакне потенцијалот на вооружените сили и граничните служби на балтичките земји.
Според извори на Си-Ен-Ен, претседателот на Претставничкиот дом Мајк Џонсон ги повикал републиканците да се спротивстават на иницијативата да му се дадат на претседателот Доналд Трамп повеќе можности да преговара со Русија.
Како резултат на тоа, само 18 партиски претставници го поддржаа документот.
Малку е веројатно дека законот ќе добие одобрение во Сенатот, кој е контролиран од републиканците, забележува АП
Во април, американското Министерство за финансии објави потрага по нови начини за притисок врз Русија поради војната во Украина.
Еден ден претходно шефот на Стејт департментот Марко Рубио изјави дека американската администрација работи на предлог-законот на Сенатот за нови санкции против Русија.
Според него, Трамп се согласил со тоа и во моментов се договара текстот на документот.