Генералниот секретар на НАТО, Марк Руте, изрази загриженост за воените вежби на Кина во близина на Тајван, повикувајќи ги членките на НАТО и пријателските земји да соработуваат за зачувување на слободните и отворени морски патишта во индо-пацифичкиот регион.
„Кина ги поддржува напорите на Русија. Кина брзо ги зголемува своите вооружени сили, вклучително и морнарицата. Не можеме да бидеме наивни. Навистина мораме да соработуваме и да процениме што се случува“, изјави генералниот секретар на НАТО на крајот од посетата на јапонското поморско пристаниште Јокосука, пренесува АП.
Руте додаде дека НАТО е загрижен за кинеските воени вежби во близина на Тајван и потврди дека многу внимателно ги следи.
Јапонија ја гледа Кина како регионална закана и во последниве години ја забрзува изградбата на сопствените воени капацитети, вклучително и подготовките за набавка на крстаречки ракети со долг дострел за одмазднички напади во случај на кинески напад.
Освен со САД, Јапонија ги прошири одбранбените врски и со други пријателски земји во Индо-пацифичкиот регион и Европа, како и со НАТО, наведувајќи дека војната во Украина покажува дека безбедносните ризици во Европа и Азија не можат да се разделат.
„САД сакаат членките на НАТО да бидат повеќе вклучени во индо-пацифичкиот регион“, рече Руте и ја поздрави неодамнешната посета на американскиот секретар за одбрана Пит Хегсет на Јапонија и посветеноста на официјален Вашингтон за зајакнување на сојузот со Јапонија.
Во последните неколку години НАТО ги зајакна своите врски со Јапонија, Јужна Кореја, Австралија и Нов Зеланд, пренесува Танјуг.