Руски воен брод вооружен со хиперсонично крстосувачко оружје од новата генерација ќе учествува во заеднички вежби со морнариците на Кина и Јужна Африка, објави во понеделник руската државна новинска агенција ТАСС.
Ова е прво официјално спомнување на учеството на фрегатата „Адмирал на флотата на Советскиот Сојуз Горшков“, која е вооружена со ракети Циркон.
Ракетите летаат со девет пати поголема брзина од звукот, со дострел од повеќе од 1.000 километри, соопшти Русија.
„Адмирал Горшков ќе оди на местото на логистичка поддршка во Тартус, Сирија и ќе учествува во заеднички поморски вежби со морнариците на Кина и Јужна Африка“, објави агенцијата повикувајќи се на неидентификуван извор од одбраната, пренесува Хина.
Во четвртокот Јужноафриканските национални одбранбени сили соопштија дека целта на вежбите е „да ги зајакне веќе развиените односи меѓу Јужна Африка, Русија и Кина“.
Вежбите ќе се одржат од 17 до 27 февруари во близина на пристанишниот град Дурбан и заливот Ричардс.
Обидот на Путин да ја наруши одбраната на САД
Ова се втори вежби на трите земји во Јужна Африка, по оние во 2019 година, се додава во соопштението на одбранбените сили.
„Горшков“ овој месец одржа вежби во Норвешкото море, откако претседателот Владимир Путин ја испрати фрегатата во Атлантскиот Океан како сигнал до Западот дека Русија нема да се откаже од украинската војна.
Русија го гледа оружјето како начин за пробивање на се пософистицираната антиракетна одбрана на Америка, за која Путин предупреди дека еден ден може да ги собори нејзините нуклеарни проектили.
Кина, Русија и Соединетите Американски Држави се тркаат да развијат хиперсонично оружје, кое се смета за начин да се добие предност пред кој било противник поради неговата брзина, пет пати поголема од звукот и поради тоа што е потешко да се открие.